Visita Portugal (Parte I)

Tetum

Porto, Coimbra no Fátima

Desde ki'ik kedas, hau hakarak tebes visita Portugal. Parese tamba hau nia familia tomak mesak pro Portugal , liuliu hau nia maternal avo mae, Auria, no (sdso) pai Canelas. Alem de sira nain rua, hau nia maun ida no tiu rua mos uluk ami sei ki'ik, konsegue halo 'suaka politik' ba Portugal. Tan ne'e, Portugal sempre mosu dalabarak iha hau nia familia nia konversa hahu husi kona ba tempu kolonizasaun, hahan to ekipa nasional futebol Portugal nian.

Ho esperensia sira ne'ebe hau hasoru durante ki'ik lori hau mai to iha hau nia desijaun atu visita Portugal iha hau nia intercâmbio iha Italia ne'e. Hau halo plano desde sedu kedas, wainhira hau to iha Italia primera vez. Hau konsegue hola bilhete husi aviaun Ryanair, viajem ba-mai, ho total 95 euros. Baratu tebes!

Segunda, 17 Augusto 2012

Wainhira hau sai husi aeroporto Ciampino, Roma, hau tu'ur ho senhor ida ho nia inan, sidadaun Portugal. Ami hahu konversa no wainhira hau dehan hau husi Timor, sira mos kontenti tebes no husu hau kona ba buat barak hahu husi hau nia objetivu ba visita Portugal, hau nia estudo to situasaun iha Timor-Leste. Konversa interesante tebes. Hau senti diferente ituan atu pratika koalia hau nia portugues ho ema husi nasaun Portugal maibe esperensia ne'e lao ho diak tamba hau kuaze bele komprende sira nia portugues inkluindu saida mak kapitaun no aeromosa sira koalia no halo avisu iha aviaun nia laran.

Viajem han kauze oras 2 ho minuto 40. Aviaun finalmente aterrajem  iha aeroporto Francisco de Sá Carneiro, Porto/Portugal. Ema hotu iha aviaun laran hahu haklalak no basa liman halo hau mos hakfodak tiha. Parese, husi esperensia hau pessoal, maioria wainhira semo ho aviaun Indonesia nian ou ba Hong Kong, ema kauze nunka basa liman wanhira aviaun tun. Esperensia ida ne'e dala tolu ona. Wainhira hau semo husi Tokyo, Japaun ba Chicago, USA no husi Chicago mai Roma Italia mos ema basa liman no haklalak wainhira aviaun aterrajem.

São Bento to Rua dos Combatentes

To iha Porto, hau sae Metro husi aeroporto mai iha estasaun Trindade, no husi estasaun ne'e, troka fali komboiu hodi mai to iha estasaun São Bento. Madre Isa no maun Valenti mak mai hein hau. Sira hein desde kedas tuku 1 loraik no hau to iha tuku 3 loraik. Depois ami nain tolu hahu lao fali kuaze minuto 10 ba iha Madre Canossiana sira nia uma fatin iha Porto ne'e. Uma Conossa ne'e mos loke eskola ba labarik hahu husi bebe to iha quarto ou quinto ano karik, se la sala.

Madre Isa servi ami sumo malirin ho croissant. Ami mos hahu konversa ituan ate kolega Gabriel (bolseiru Timor oan ne'ebe halo hela nia mastrado iha Porto) mos mai hamutuk tan. Kuaze tuku 4.30 loraik, hau koko tenta ba Amaro (alias Caisiva), hau nia kolega SMP Canossa. Nia mos halimar hela iha Porto no atu fila ba Coimbra iha Segunda (17 Aug) ne'e. Entaun, ami rua kombina no konkorda atu viajem hamutuk ba iha Coimbra iha loron ne'e kedas. Ami rua sae komboiu ALFA ne'ebe ho bilhete nia folin kauze 17 euros. Karun maibe komboiu ne'e extravagante tebes! Iha komboiu ne'e, ami rua mos hasoru maun Afiku, Timor oan ne'ebe agora servisu iha UK maibe uluk hela kleur iha Portugal mos. 

Viajem kuaze oras ida ami to duni iha Coimbra! Husi estasaun komboiu, ami sai mai hein bis numero 5 atu ba iha Amaro nia apartamentu iha Rua dos Combatentes. Antes de to iha fatin destinu, kareta ida mai kose los bis ida ami sae ne'e halo kondutor bis nian saitaiadu. Sira hahu koalia no telefone ba polisia, ami mos hahu tun ona tamba parese sei han tempu naruk atu resolve asidente ida ne'e. 

Ami lao kuaze minuto 20 nia laran no ikus mai to iha apartementu no maun ida naran Alo mak loke odamatan mai ami. Isin kole los maibe hau desidi ba liu haris atu refreska an. 

To'o iha ne'e lai depois mak hau sei hakerek tan kona ba hau nia visita ba Portugal.
Video iha karaik ne'e hau hasai husi janela apartementu Amaro nian. Nota katak iha liman los ne'e maka Igreja Sao Jose ho estadio EFAPEL sidade Coimbra nian. 

Visit Portugal (Parte II)